ورحت للسوبر ماركت أشتري أغراض وأنا في السوبر ماركت شفت بنت لابسه عبايه كتف
بسسس هذي اللي تبي الرقم
رحت لها بس التفتت علي وقالت انت وقح وقليل ادب
هاااه ليييش كذا طيب !!!
طيب هي لابسه عبايه كتف !!!
يالله يالله ماعلينا يمكن واحد رقمها قبلي
المهم رحت للإستراحه واتصل علي صديقي يوووه وش يبي هذا الحين !!
اووف يبيني استقبله بالمطار جاي من بيروت
طيب اروح للمطار ليش لا
رحت للمطار ولقيت ٣ بنات معهم امهم واخوهم الصغير توهم نازلين من طيارة لبنان
أبو الصياعه ياشيخ مسافرين لحالهم بالله وش يسوون بالله معروف أصلاً وش يسوون
ماراحو سياحه رايحين صياعه.
المهم استقبلت خويي ووديته لبيتهم
رجعت لبيتنا وجاني ألم في راسي رحت للمستشفى ودخلت على الدكتوره وطلعت سعوديه
ايييييوه عاد دكتوره معروفه صياعه وخليطي
المهم اصلاً وهي تعالجني تناظرني نظرات مهيب حلوه.
لحظه أنا جالس أقص لكم ولا عرفتكم بأسمي ؟!
أنا سلبي
إسمي سلبي أنا اللي أحكم على كيفي أنا اللي أطلع العاقل صايع والصايع عاقل
كيييفي عقلي وأنا حر فيه وأبشركم لقيت ناس كثيييييير تصدقني وتمشي على نظرتي للبشر وأكبر دليل شوفو أهل النظره السلبيه وش كثرهم
بس الخوف كله من أهل النظره الإيجابيه لايكثرون طيب كيف ماأكثرهم اهااا الحل بسيط أسيطر على عقول الجاهلين !!
بس :( اتوقع معد فيه أحد جاهل الأجهزه الذكيه ثقفت العالم.
يووووووووووووه وش يبي ذاااا اللي بيتكلم!!
السلام عليكم ورحمة الله وبركاته ^_^
أنا إيجابي إسمي إيجابي
في يوم من الأيام إستيقظت من منامي وإتجهت للسوبر ماركت لأشتري بعض الحاجات وأنا أثناء تبضعي شدني ذلك الموقف وهي بنت تتبضع نعم إنها تلك الفتاه التي تلبس العبايه على كتفها ولكن لماذا أعجبتني هذه الفتاه لأنني سمعتها تقول لوالدها كبير السن ياوالدي إجلس هنا لاتتعب قدماك وأنا سأذهب لأحضر ماتبقى من حاجات وحلفت عليه أن يريح نفسه.
خرجت من السوبر ماركت وأنا مبتسم وفرحان الدنيا مازالت بخير :)
إتجهت لإستراحة الأصدقاء وإذا بصديقي يتصل
أجبت عليه اهلاً بك ياصديقي العزيز
طلب مني أن أذهب إليه في المطار لأستقبله هناك
ذهبت للمطار وعندما دخلت شاهدت ٣ فتيات مع والدتهم وطفل صغير معهم
وسمعت إحداهم تقول ياأمي علاج مستشفى لبنان لايكفي بل إننا المره القادمه سنتجه إلى لندن لإستكمال علاجك
وسمعت والدتهم تقول لا لاأريد أن أكلف عليكم الخسائر وسمعت الفتيات يقولون كنوز الدنيا لاتساوي قدمك ياأمنا الغاليه
ذرفت دمعتي لهذا المنظر الإنساني الذي يثلج كل قلب
إستقبلت صديقي وذهبت به لبيته
وأنا في الطريق لبيتي أصابني صداع فظيع جداً وإتجهت للمستشفى
دخلت العياده وإذا بطبيبه من بلدي خلوقةً جداً جداً وإنسانه بمعنى الكلمه
عالجتني وشكرتها وقالت لي لاشكر على واجب فهذا واجبي وعملي ياأخي العزيز.
خرجت من عندها وأنا مرفوع الرأس فرحاً بماوصلت إليه بنت بلدي من العلم والرقي.
كم أنا فخوراً بها وفخوراً بكل رجل وفتاه إيجابيين في نظرتهم للحياه وللبشر.
نعم لنجعل نظرتنا إيجابيه في كل شيئ.
ماذا سنخسر !!!
وماذا سنستفيد!!؟
بالطبع أننا لن نخسر.
وبالتأكيد أننا سنكسب راحة البال
وماهي الحياة الدنيا !؟
إلا راحة بال.
محبكم وأخوكم الذي يفتخر بكم:
sami_almousa
ليست هناك تعليقات:
إرسال تعليق